25 October 2008
يا رب
.
الدنيا تمطر كل يوم
زي النهارده كده
عشان الفلاحين
مايعرفوش يحرقوا قش الرز
.
!سنيف!...سنيف
هو الجو ريحته غريبة كده ليه؟!؟
هما رجعوا يحرقوا تاني وللا ايه؟!؟!؟!؟
.
لأااااااااا(إزاااااااي)ااااااااااا
------------------------------
تحديث: افتكرت الناس اللي شفتهم ماعندهمش سقف يحمي بيوتهم من المطر...أو اللي عنده سقف بس في الشتا يبان أد ايه ضعيف و فيه ألف رقعة و خرم
الحمدلله اللي من علينا بعدم استجابة الدعاء لو كان خطأ

Labels:

 
posted by zemos at 12:45 AM 2 ملاحظات السادة الزوار
10 October 2008
إذاعة ستوديو
تقدم
عــبــر الأثــيــر
'Radio
حكايتي مع الراديو تبتدي من زمااااان... من بيت جدي و جدتي قبل ما أدخل المدرسة
الفصل الأول :البرنامج العام
إذاعة جمهورية مصر العربية... من القاهرة...همسة عتاب...قال الفيلسوف...أخبار خفيفة...عائلة مرزوق...عالناصية...أنت تسأل و الكومبيوتر يجيب (الكومبيوتر كان سلاح نووي أيامها و تقريبا الإذاعة كان عندها الجهاز الوحيد في مصر و كان منحة وبيأجروه بالساعة)و برامج تانية لسه زي ما هي بتتراتها ليومنا هذا !...تراث
حتى في المصيف كنت أقوم الساعة 8.20 بالظبط على مزيكة همسة عتاب الشهيرة في راديو جدو الأثري اللي شبه الراديو اللي فوق ده...
الفصل الثاني: الشرق الأوسط
جبنا كشاف بشاحن و كان مدمج فيه راديو... كنت بأموت في الإختراع ده خصوصا إني كنت بأحب النور يقطع..مش عشان أشغل الكشاف..لأ..عشان أسمع راديو وأتسلى و أحب النور يغيب عشان ما أذاكرش...ما دام مخلص الواجب... و كنت أحب أشغله فوق السطوح في الأجازة كمان
في الفترة دي كانت الشرق الأوسط هي المسيطرة عليا... في رمضان في غير رمضان..صبح ليل... كنت أسمع دعاء الصباح والمسلسل قبل المدرسة.. و أما أرجع أفتح الراديو تاني و ساعات أحل الواجب عليه..حفظت البرامج و المواعيد و التترات و المذيعين و أصواتهم و اتصدمت لما شفت في مجلة صورة للدلوعة!!... الست... إيناس جوهر
الفصل الثالث: صوت اسرائيل من أورشليم القدس
فضول مش أكتر خلاني أنصت للإذاعة اللي مش واضحة دي بين الشرق الأوسط و الشباب و الرياضة على تدريج مؤشر الراديو
عرفت إنهم في الإذاعة دي كللللللللهم فلسطينيين و كانت إذاعة منوعات من الدرجة الأولى طردت الشرق الأوسط من المنافسة.. سباق أغاني تلاقي سياسة تلاقي أخبار تلاقي- يمكن أكتر ما شدني لكنات أهل الشمال الجديدة عليا قبل دخول الدش بيتنا - بس اكتشفت بعدين ان في كتيييير كانوا زيي بيسمعوا الإذاعة دي و مخبيين عشان اسمها...صوت اسرائيل
الفصل الرابع: البرنامج الموسيقي
من أيام الراديو أبو كشاف - حالته وقتها اتدهورت كحال كل منتج صيني يحترم نفسه - اتعرفت عليها... و كنت أشغلها و أسجل من عليها شرايط ما تتعدش و أفتكر إني كنت بأسجل ع الشريط مرة و اتنين طبعا كان جالي في الإعدادية راديو كاسيت ناشيونال -قبل الإندماج مع باناسونيك- هدية نجاحي و كتير كنت انام و أنا مشغلها شان الموسيقى الخفيفة اللي بتشتغل بعد 12
الفصل خامس: مونت كارلو و بي بي سي العربيتان
هدية جديدة من شركة أدوية... كاسيت سوني محترم..دخل لأسطول الراديو كاسيت بتاعي....و معاه اكتشفتهم....إذاعات عالمية محترمة و تقيلة عترت فيهم بالصدفة على الموجة المتوسطة و إلى الآن بأسمعهم و خصوصا...أخبار بي بي سي... لا منافس
الفصل السادس: نجووووووم أف أم
اعدادي هندسة...أثناء رسم لوحة هندسية مستعصية ..أدرت مؤشر الراديو (أبو شاحن بتاع زمان... باظت بطاريته و بأه بياخد كهربة مباشرة و الإيريال اتقطم و استعضت عنه بسلك عريان بألفه على منشر البلكونة).. و إذا بي أجد إذاعة أغاني جديدة نضيفة مفيهاش مداخلات سخيفة من مذيع أو ضحكة مذيعة (الله يمسيها بالخير طنط ايناس) أو قطع عشان الأخبار أو اهداء أو برنامج فترة المساء و السهرة و خلافه
كنت مُصر إنها إذاعة لبناني و مكانوش بيقولو غير مزيكا على كيف كيفك100فاصله6 بس..من غير اسم
إلى أن وجدوا رعاة رسميين و زهزهت و بدأوا البث الفعلي... لكني أنجزت معاها أحلى لوح الرسم الهندسي و لا زالت أحلى أوقاتها بالليل متأخر حيث لا إعلانات ولا مذيعين... و ساعات بيعملوها في العيد
الفصل السابع: متفرقات
في اذاعات تانية كتيرمنها اللي عديت عليها مرة و مالقيتهاش بعد كده... أو ما اهتميتش أسمعها بانتظام و منها اذاعة الجمهورية السورية و المملكة العربية السعودية و جوول أف أم اللي كنت بأسمعها جنب التليفزيون في كاس أفريقيا الأخير أبو تعليق فرنساوي ده.. كمان إذاعة حول العالم المسيحية و الإذاعة التعليمية و البرنامج الأوروبي و إذاعة الدويتشه فيله الألمانية الناطقة بالعربية و كتيييييييييييييير يمكن ما اعرفش أحصرهم
.
و مسك الختام... إذاعة القرآن الكريم في القاهرة و نابلس بفلسطين عالنت
مكانش ينفع أحطهم في الترتيب
لأن المفروض القرآن معانا طول الوقت
.
رغم إني عاشق الصورة... لكن الراديو حاجة تانية
الراديو تواصل
احساسك بإن في حد على الجانب الآخر مهتم تسمعه...مين المقرئ اللي هايتلو السورة القرآنية الجاية ... الراجل اللي بيخطب ده بيقول ايه.. المتصل بيشتكي من ايه ... الدكتور بينصح بإيه...هتلاقي حاجة تخصك أكيد...هايلعبوا الأغنية الجاية ايه؟!؟!؟
الراديو معايا في أوضتي و المطبخ و عالدش و عالموبايل و في العربية... بأسمعه..أو خلفية لحاجة بأعملها...
بأحلم بساوند سيستم محترم في منزل أحلامي... بصوت نقي جدا بتوزيع محترم و جودة و من غير تشويش... عالراديو
----------------------------------------------------
لينك لبلوج عليه لينكات إذاعات بالجملة
moro

Labels:

 
04 October 2008
Dry leaves(C+up) by bharathiclick.
.
الظاهر إنها حالة عامة
أو غاز مجهول من نواتج احتراق قش الأرز

أو آشعة كونية غامضة

أو موسم من مواسم السنة له أثر على البشر

***

أنا و هما

كلنا بنعيد حساباتنا

بنغير جلدنا

بننفض الورق اليابس عن فروعنا
.
سموها زي ما تسموها

***
الله أعلم فاضل أد ايه

و هايحصل ايه

و هانعمل ايه

اللي فات مش مثالي

و اللي احنا فيه مش هو العشرة على عشرة

و الجاي شكله صعب

و كل ما تنوي على اتجاه الدنيا تتآمر عليك في الإتجاه

المعاكس و كأنها مستنياك تقوم من مكانك بس

و الله مؤمن إن الدنيا مش غاية و الجنة غالية

بس السفر بعيد و الزاد قليل

***

واضح إني محتاج شوية لياقة ايمانية

و هَجر بعض الحاجات

و هِجرة إلى الله


Labels: